Ыам ыйын 1 күнүн көрсө, республикатааҕы инбэлииттэри социальнай-чэбдигирдэр кэлим реабилитационнай кииҥҥэ чэбдигирдии куурсун ааһар дьоҥҥо анаан эҕэрдэ кэнсиэрдээх Мария Захарова – Күүкэй кыыһа ыалдьыттаан ааста. 72 саастаах Мария Васильевна аҕам сааска бэриммэккэ, билигин да айа-тута, ыллыы-туойа, эдэрдии эрчимин илдьэ сылдьар. Кини биир күн икки куорпуһунан ырыатын-тойугун бэлэхтээн, дьону үөрдэн, сэргэхситэн ааста.
Мария Захарова — реабилитационнай киин уруккуттан ыкса доҕоро. Кини 62 сыл сыанаҕа ыллаабыт, 52 сыл суоппарынан үлэлээбит, СР культуратын туйгуна, «Норуот биһирэбилэ» анал аат хаһаайката, биир ураты суоллаах-иистээх саха далбар хотуна. «Толлумтуота суох, дьаһаллаах майгым, арааһа, элбэх уол оҕолоох дьиэ кэргэҥҥэ соҕотох кыыс оҕо буолан улааппыппыттан буолуо» — диэн күлэн кэпсиир Мария Васильевна.
«Мария Захарованы социальнай эйгэ үлэһиттэрэ аһыныгас сүрэхтээх, аһаҕас майгылаах киһиннэн билэллэр. Кини маннык аҕам саастаах, доруобуйаларынан мөлтөөбүт-ахсаабыт дьоҥҥо өйөбүл буолан, санааларын көтөҕөр сыаллаах аһымал кэнсиэрдэри бэлэхтиир үгэстээх. Бүгүҥҥү күҥҥэ уопсайа 2000-тан тахса аһымал кэнсиэри оҥорбут. Биһиги реабилитационнай кииммитигэр эрэ буолбакка, «Чэбдик», «Алаас» санаторийдарынан сылдьан, дьону кытта көрсөн, үтүө санааны үллэстэр. Биһиэхэ Мария Васильевна маннык кэнсиэрдэри хас заезд аайы үөрэ-көтө кэлэн бэлэх уунан барар», — диэн реабилитационнай киин культурнай тэрийээччитэ Саргылана Алексеева кэпсээтэ.
РСОЦКРИ